Na kóncu prózdninow, njeposrědnje před spočatkom šulskeho lěta 2001/2002, dóstachmy struchłu powěsć, zo njepřizwoli hižo kultus w mjenowanym šulskim lěće dowolnosć, wjesć 5. lětnik na Serbskej srjedźnej šuli "Jurij Chěžka" w Chrósćicach.

Rozsud zamołwitych tehdy scyła njezrozumjacych, ale dyrbjachmy jón dospołnje bjezmócni přiwzać a njesć. Mysl, zo njesměmy hižo na tutym serbskim kubłanišću wuwučować 5. lětnik, potajkim 17 ryzy sebsce rěčacych šulerjow, nas porazy. Zdobom so nam wuwědomi, zo so ze zawěrom Sebskeje srjedźneje šule w Chrósćicach wažny stołp serbskosće wutorhnje a njewuměnliwa wosebitosć wjeski so pozhubi. Wšě prócowanja ze stron staršich, wučerjow a duchownych, wšě jednanja mjez instancami, wšě diskusije mjez zastupjerjemi zamołwitych w ziawnosći, haj samo "Chrósćanski zběrk" njezamochu kultus pohnuć, swój rozsud cofny. Ze sylzotymaj wočomaj dyrbjachmy potom přihladować, kak podachu so srjedź septembra lěta 2001 17 šulerjow, hromadźe ze staršimi a mnoho sympatizantami na puć do Delan.

W Ralbicach so šulerjo 5. lětnika wutrobnje přiwzachu. Ralbičan wučerjo a šulerjo prócowachu so jara, stworić "Chrósčanam"dobru wuknjensku atmosferu a podpěrachu jich we wšěch starosćach a prašenjach.

"Prěni" Chrósčanski 5. lětnik w Ralbicach zažiwi so bórze do noweho cyłka. Lěto pozdźišo, ze spočatkam šulskeho lěta 2002/2003 podachu so druhi raz Chrósčan šulerjo 5. lětnika do Ralbic.Wot spočatka šulskeho lěta 2003/2004 njeeksistuje hižo Serbska srjedźna šula Chrósćicy. Wučerjo tutoho kubłanišća dźěchu hromadźe ze "swojimi" rjadownjemi do Serbskeje srjedźneje šule w Ralbicach. Za někotrehožkuli šulerja a tež wučerja přinjese tuta změna kubłanišća mnoho nutřkowneho njeměra, mnoho wotewrjenych prašenjow, haj žadaše samo wěste přewinjenje. Za wšěch woznamjenješe to, wopušćić lětdźesatki znatu wokolinu, so wzdać krutych tradicijow, kotrež su na tutym kubłanišću rostli a wotpołožić wšelake zwučene wotběhi šulskeho dźěła.

Hdyž dźensa wróćo zhladuju, móžu zwěsćić, zo su so šulerjo, wučerki a wučerjej Chrósčan šule w Ralbicach derje přiwzali. W dobrej mjezsobnej atmosferje spytamy wšě nadawki zdźěłowanja a kubłanja nětko na "našej" Serbskej srjedźnej šuli w Ralbicach přiwzać a najlěpje zmištrować. Přetož kubłanje serbskich dźěći a serbskeje młodźiny je a wostanje nadawk serbskich swójbow a serbskeho wučerja!

Do přichoda přeju wšěm šulerjam wjeselo a wutrajnosć při wuknjenju, wučerkam, wučerjam a techniskemu personalej spomožne skutkowanje na tutym kubłanišću, krutu strowotu, spokojnosć a bohate bože žohnowanje.