Marhata Korjeńkowa

Přez 34 lět kulturne chórowe dźěło na našej šuli 

1975 z woswjećenjom noweje šule w Ralbicach na započatku noweho šulskeho lěta běch tež ja jako nowowučerka zbožowna, směć tule na nowym městnje započinać z natwarom chóra šule. Po dokładnych rešeršach jako čłonka Koła serbskich wuměłcow znajach serbsku hudźbnu literaturu, chórowe hibanje w Serbach a zaběrach so w swobodnym času težintensiwnje z folkloru. Temperament delanskich dźěći bě za mnje nastork ke komponowanju nowych serbskich dźěćacych spěwow.

Hižo po prěnich tydźenjach mojeho wučerjenja bě za mnje jasnje, zo stworju za naš, mój chór, za našu šulu a wokolinu nowe dźěćace spěwy. Po boku mějach znatych spisowaćelow, kolegow, kotřiž rady, pilnje a njesprócniwje tworjachu za mnje rjane basnje ke kóždej składnosći.

Běchu to Marja Krawcec a Jan Wornar. Tak nastachu stotki serbskich dźěćacych spěwow a z tym tež nowy stil serbskeje dźěćaceje hudźby, wšako mějachu chórowe dźěći z tym tež móžnosć, so na jewišću ponibować abo samo rejować.

Serbske rozhłosowe stacije MDR a ORB dawachu nam nadawki, wjetšinu z tutych spěwow nahrawać, a tak mamy dźens korbik połny jara dobrych darow, wuslědkow- mjenujcy cyklusy „Mjetelčka“, "Mjatelik", "Doma, doma rjenje je", "Dobre ranje" - spěwy, "Knjez Mróz a Knjeni Zyma" - hornjo- a delnjoserbsce nahrate, "Škowrončki" jako CD a "Hwizdajo po dróze" jako kasetu, hdźež zasłyšimy mjez druhim zhromadne nahrawanja našeho šulskeho chóra z chórami župy "Michał Hórnik" Kamjenc. Nimo toho nahrawamy mnoho dalšich delnjoserbskich a hornjoserbskich spěwow, jingle "Dobre ranje, lube dźěći" a spěw "Pěskowčika" w hornjoserbšćinje. Wjele hodźinow dźěła bě, našim dźěćom nawučić tež w delnjoserbskej rěči spěwać móc! Nic jenož wustupy ze spěwo-rejohru "Knjez Mróz a Knjeni Zyma" (choreografija Alena Kubańkowa) a "Ja baju Wam dźens bajku" po našich serbskich wjeskach, ale tež wustupy "Łužica live" w Chrósćicach, na Drježdźanskich hudźbnych hrach (Musikfestspiele) a na festiwalach serbskeje kultury stejachu na lisćinje našich dožiwjenjow. Tež naš serbski komponist Jan Paul Nagel bě za mój komorny chór wjacehłósne spěwy skomponował, samo tež dźěle Božeje mšě. Mnohe myta dósta naš komorny chór za jara dobru kwalitu spěwanja.

Na tutym městnje dźakuju so wutrobnje wšitkim spěwarkam a spěwarjam za wutrajnosć a prócu w našim šulskim chórje a wšitkim, kotřiž za ćichim dźěłachu a mje jako chórowu nawodnicu lěta dołho podpěrowachu. W lěće 2009 wuńdźe hišće druha CD pod titulom "Woheń a woda".

Za přichod sebi přeju dale mnoho angažowanych spěwarkow a spěwarjow w našim chórje.